បន្ទាប់ពីឃ្លាតឆ្ងាយពីសង្វៀនប្រដាល់អស់រយៈពេលជាច្រើនឆ្នាំកន្លងមក លោក អេ ភូថង អតីតកំពូលអ្នកប្រដាល់ដែលអ្នកស្នេហាវិស័យកីឡាប្រដាល់ក្បាច់គុនបុរាណខ្មែរចាត់ទុកជា អធិរាជកែងចេះជង្គង់ហោះ នឹងវិលត្រឡប់មកកាន់សង្វៀនសារជាថ្មី ក្នុងជំនួបមិត្តភាពអន្តរជាតិចុងក្រោយបង្អស់របស់លោក លើសង្វៀន សមរភូមិអ្នកប្រយុទ្ធភេសជ្ជៈគោជល់ របស់ស្ថានីយទូរទស្សន៍ ភីអិនអិន នាថ្ងៃអាទិត្យ ទី០៤ ខែមិថុនា ឆ្នាំ២០១៧ នេះ។
ការវិលត្រឡប់មកកាន់សង្វៀននេះ ដែលធ្វើឡើងក្នុងគោលបំណងស្វែងរកថវិកាជួយមន្ទីរពេទ្យ គន្ធបុប្ផា ជាការរួមចំណែកមនុស្សធម៌ ត្បិតលោកពុំមានទ្រព្យធន ក្រៅពីប្រើអាជីពដែលធ្លាប់ពឹងអាស្រ័យស្ទើរមួយជីវិតទៅហើយមួយនេះ។
គ្រូបង្វឹកគុនខ្មែរជម្រើសជាតិកម្ពុជាវ័យ៤៣ឆ្នាំរូបនោះ ត្រូវទទួលស្វាគមន៍អ្នកប្រដាល់ថៃរួមជំនាន់ កាណុងស័ក្តិលេក ខេធីយិម ដែលជាគ្រូបង្វឹកប្រចាំក្លឹបប្រដាល់ ផ្រានយីស៊ីបហុក ក្នុងប្រភេទទម្ងន់៩០គ.ក្រ។ក្រៅពីវត្តមានអធិរាជកែងឆេះជង្គង់ហោះ អេ ភូថង កំពូលអ្នកលេងកណ្ដាប់ដៃមហាទម្ងន់ប្រជាប្រិយភាពខ្ពស់នាពេលបច្ចុបន្ន រឿង សោភ័ណ្ឌ ក៏ទទួលភារៈកិច្ចស្វាមន៍អ្នកប្រដាល់ថៃជំនាញក្បាច់រន្ទះជើង ស៊ុភឆ័យ ក្នុងប្រភេទទម្ងន់ ៦៩គ.ក្រ ផងដែរ។
នេះជាការប្រកួតលើកទី៣របស់សិស្សគុនខ្មែរក្លឹបម្គុដរាជសីហ៍ក្នុងកម្មវិធី សមរភូមិអ្នកប្រយុទ្ធ ដែលការប្រកួតចុងក្រោយកន្លងទៅថ្មីៗនេះ រូបគេបានស្មើពិន្ទុ និងជើងខ្លាំងថៃ ឃុនផែន។
ដើម្បីលើកស្ទួយវិស័យកីឡាប្រដាល់ក្បាច់គុនបុរាណខ្មែរ និងបណ្តុះបណ្ដាលថ្នាលកីឡាករជំនាន់ថ្មី សមរភូមិអ្នកប្រយុទ្ធភេសជ្ជៈគោជល់ នឹងរៀបចំការប្រកួតមិត្តភាពអន្តរជាតិសម្រាប់អ្នកប្រដាល់វ័យក្មេងជារៀងរាល់សប្ដាហ៍។ សម្រាប់ថ្ងៃអាទិត្យទី០៤ ខែមិថុនានេះ កូននាគជាយដែនខេត្តបន្ទាយមានជ័យ វ័ន្ត ថៃដេ ទទួលបានឱកាសសាកល្បងសមត្ថភាព និងអ្នកប្រដាល់វ័យក្មេងថៃ កានក្រៃ ក្នុងប្រភេទទម្ងន់ ២៧គ.ក្រ។
ព្រឹត្តិការណ៍ប្រដាល់គុនខ្មែរដ៏កក្រើកមួយនេះនឹងចាប់ផ្ដើមនៅវេលាម៉ោង ៥៖០០ល្ងាច ហើយផ្សាយផ្ទាល់លើកញ្ចក់ទូរទស្សន៍ ភីអិនអិន។ សម្រាប់បងប្អូនដែលមានសទ្ធាចង់ចូលរួមឧបត្ថម្ភលោក អេ ភូថង អាចទំនាក់ទំនងដោយផ្ទាល់មកកាន់លោក ស្រ៊ឺ ស្រេង ប្រធានផ្នែកកីឡារបស់ស្ថានីយទូរទស្សន៍ ភីអិនអិន តាមរយៈលេខទូរស័ព្ទ 016 757 168៕ ផ្តល់សិទ្ធិដោយ៖ Kqube.net
ទស្សនាឈុតខ្លីសូមចុច៖
No comments:
Post a Comment